•   Call us   +959 31673785

အမျိုးသားအဆင့် အနိမ့်ဆုံးလုပ်ခနှုန်းထားသတ်မှတ်ရေး ကော်မတီ အစည်းအဝေးမှ သတ်မှတ်သည့် နှုန်းထားအား ကန့်ကွက်ကြောင်း ထုတ်ပြန်ကြေညာချက် ၂၀၁၇ ခုနှစ် ဒီဇင်ဘာလ ၂၉ ရက်

၂၀၁၇ ခုနှစ် ဒီဇင်ဘာလ ၂၉ ရက်နေ့တွင် ကျင်းပပြုလုပ်သည့် အမျိုးသားအဆင့် အနိမ့်ဆုံး လုပ်ခ နှုန်းထား သတ်မှတ်ရေးကော်မတီအစည်းအဝေးမှ သတ်မှတ်သည့်နှုန်းထားအဖြစ် တနေ့ ၄၈၀၀ ကျပ် သတ်မှတ်လိုက်မှုအား မြန်မာနိုင်ငံတောင်သူလယ်သမား၊ စိုက်ပျိုးရေးနှင့် စားသောက်ကုန်ထုတ် လုပ်ငန်း ပေါင်းစုံ အလုပ်သမားသမဂ္ဂများ အဖွဲ့ချုပ်မှ ကန့်ကွက် လိုက်ပါသည်။

မြန်မာနိုင်ငံ တောင်သူလယ်သမား၊စိုက်ပျိုးရေးနှင့် စားသောက်ကုန်ထုတ်လုပ်ငန်းပေါင်းစုံ အလုပ်သမား သမဂ္ဂများ အဖွဲ့ချုပ်သည် ၂၀၁၇ ခုနှစ် ဒီဇင်ဘာလ ၂၃ ရက်နေ့တွင် ရန်ကုန်မြို့ ကန်ပါတ်လမ်းရှိ ချတ်ထရီယံ ဟော်တယ် တွင် ကျင်းပပြုလုပ်ခဲ့သည့် အနိမ့်ဆုံးလုပ်ခနှုန်းထားသတ်မှတ်ရေး အလုပ်ရုံ ဆွေးနွေးပွဲ၌ အစိုးရ၊ အလုပ်ရှင်နှင့် အလုပ်သမားထုအကြား အပြုသဘောဆောင်သည့် ညှိနှိုင်းမှုအား အခြေခံကာ အဆင်ပြေ သင့်တင့်သည့် လုပ်ခနှုန်းထားဖြစ်သည့် တနာရီလျှင် ၇၀၀ ကျပ်အားဖြင့် တရက်လျှင် ၅၆၀၀ ကျပ်အား သတ်မှတ်ပေးရန် အဆိုပြုခဲ့သည်။

မိမိတို့တောင်းဆိုသည့် လုပ်ခနှုန်းထားသည် မိသားစုဘ၀ အခြေခံစားဝတ်နေရေးအတွက်သာ ဖြစ်သည်ကို အလုပ်ရှင်များ လုပ်ငန်းရှင်များ အားလုံးနားလည်ပြီးဖြစ်ပေလိမ့်မည်။ လက်ရှိမြန်မာနိုင်ငံ အခြေခံ အလုပ်သမား လယ်သမားများ၏ မိသားစုတနေ့တာ ကုန်ကျစရိတ်သည် အနိမ့်ဆုံးတနေ့ ၅၆၀၀ ကျပ်ရှိနေသည်ကို အားလုံး သိရှိနေပေသည်။

မြန်မာနိုင်ငံသည် ဒီမိုကရေစီ အသွင်ကူးပြောင်းရေး ကာလဖြစ်သဖြင့် ပထမဦးစွာ ပြုပြင်ပြောင်းလဲ ရမည့် အရာသည် အခြေခံပြည်သူတရပ်လုံး လူ့ဂုဏ်သိက္ခာနှင့်အညီအသက်ရှင် နေနိုင်ရေးပင်ဖြစ်သည်။  ထို့ကြောင့် အလုပ်အကိုင်ရရှိရေးနှင့် ရရှိသည့်အလုပ်အကိုင်သည် မိသားစုဘ၀များ အဂတိတရား ကင်းရှင်းစွာ စားဝတ်နေမှုပြုရေးသည် ဒီမိုကရက်တစ် အစိုးရ၏ မဖြစ်မနေထမ်းဆောင်ရမည့် အဓိက တာဝန်တရပ်ဖြစ်ပေသည်။ မိမိတို့ လုပ်သားထု၏ တောင်းဆိုချက်ဖြစ်သည့် အနိမ့်ဆုံးလုပ်ခ တနေ့လျှင် ၅၆၀၀ ကျပ်နှုန်းဖြင့် သတ်မှတ်ခဲ့ပါလျှင် မိမိတို့ဘက်ကုန်ထုတ်စွမ်းအားစုတိုးတက်ပြီးဘေးကင်းသည့် လုပ်ငန်းခွင် ဖြစ်လာပြီး ပျော်ရွှင်ကျန်းမာသည့် လုပ်ငန်းဝန်းကျင်ဖြစ်လာပေမည်။ သို့မှသာ အလုပ်အကိုင် အခွင့်အလမ်းများ ဖြစ်ပေါ်စေမည့် လုပ်အားကဲကုန်စည်ထုတ်လုပ်သည့် ရင်းနှီးမြှုပ်နှံမှု အသစ်များ ရောက်ရှိလာမည်ဟု ယုံကြည်သည်။

ထို့ကြောင့် ပုဂ္ဂိလိက ကုန်ထုတ်စွမ်းအားစုနှင့် သက်ဆိုင်သည့် ၀န်ကြီးဌာနများနှင့် မဖြစ်မနေပါဝင်ရမည့် ၀န်ကြီးဌာနများအားလုံးမှ ဦးဆောင်၍ အလုပ်သမားများတောင်းဆိုထားသည့် လုပ်ခနှုန်းထား တနေ့ ၅၆၀၀ ကျပ် အား အလုပ်ရှင်များမှ ပေးနိုင်ရန်အတွက် ကူညီဆောင်ရွက်မှုများပြုရန် လေးလေးနက်နက် တိုက်တွန်း လိုက်ပါသည်။

မိမိတို့မြန်မာနိုင်ငံတောင်သူလယ်သမား၊ စိုက်ပျိုးရေးနှင့် စားသောက်ကုန်ထုတ်လုပ်ငန်းပေါင်းစုံ အလုပ်သမားသမဂ္ဂများအဖွဲ့ချုပ်အနေဖြင့် အနိမ့်ဆုံးလုပ်ခနှုန်းထား တနေ့ ၅၆၀၀ ကျပ် သတ်မှတ်ရေး အောင်မြင်စေရန် အစိုးရအဖွဲ့အစည်းများ၊ အလုပ်ရှင် အဖွဲ့အစည်းများနှင့် အလုပ်သမားထုအတွင်း အားလုံးနှင့် လိုအပ်သည့် ပူးပေါင်းကူညီဆောင်ရွက်မှုများ လက်တွဲလုပ်ဆောင်ရန် အသင့်ရှိပါကြောင်း သဘောထား ထုတ်ပြန်ကြေညာအပ်ပါသည်။

 

 

မြန်မာနိုင်ငံတောင်သူလယ်သမား၊ စိုက်ပျိုးရေးနှင့်

စားသောက်ကုန်ထုတ် လုပ်ငန်းပေါင်းစုံ

အလုပ်သမားသမဂ္ဂများ အဖွဲ့ချုပ်

ဖုံး ၀၉ ၂၅၀၀၄၅၇၃၀